Plaid Cymru Castell-Nedd a Dwyrain Abertawe Gweithio'n galed dros Bobl Castell-nedd, a Chymoedd Tawe, Nedd a Dulais.

Tra ar ymweliad â chanol tref Castell-nedd gydag Ymgeisydd Etholiad Plaid Cymru dros Gastell-nedd, Sioned Williams, dywedodd arweinydd Plaid Cymru, Adam Price, y byddai ei blaid yn rhoi adfywio canol tref wrth galon ei weledigaeth economaidd  ar gyfer Castell-nedd ac ar gyfer Cymru.

Wrth siarad â busnesau yng nghanol tref Castell-nedd ac ym marchnad dan do hanesyddol Castell-nedd yn ystod yr ymweliad, bythefnos cyn etholiad y Senedd ar 6 Mai, clywodd Adam Price a Sioned Williams fod rhenti a chyfraddau busnes uchel, tan-fuddsoddiad yn y dref a phryderon ynghylch ymddygiad gwrth-gymdeithasol a digwyddiadau troseddol diweddar yn effeithio ar nifer o fusnesau yng Nghastell-nedd - lle mae llawer o siopau'n wag ar hyn o bryd.

Dywedodd Adam Price: “Mae Castell-nedd yn dref wych, mae ganddi botensial enfawr. Os caiff ei hethol, bydd Sioned Williams yn gwneud gwahaniaeth mawr i'r ardal hon a byddai llywodraeth Plaid Cymru yn gwneud cefnogi busnesau lleol ac adfywio canol trefi ledled Cymru yn brif flaenoriaeth. Rhai o'r mesurau y byddai Plaid Cymru yn eu cymryd fyddai penodi rheolwyr i gydlynu buddsoddiad, rhaglen gynnal a chadw a hyrwyddo canol tref a gwneud canol trefi sydd â chyfraddau uchel o siopau gwasg yn rhydd o gyfraddau. ”

Dywedodd Sioned Williams: “Rwy’n credu bod pobl Castell-nedd a’r cymunedau cyfagos yn chwilio am ffocws mwy lleol gan eu cynrychiolwyr gwleidyddol ac mae canol tref Castell-nedd a llawer o’n strydoedd mawr lleol yn galw'n daer am well gefnogaeth. Rhaid i ganol ein trefi fod yn lleoedd prysur, bywiog, cymdeithasol a diogel. Ar yr un pryd, os caf f'ethol, byddaf yn gweithio'n galed i fynd i'r afael ag achosion o dor-cyfriath ac ymddygiad gwrth-gymdeithasol, wrth sicrhau bod pobl bregus a phobl ifanc yn cael y gefnogaeth sydd ei hangen arnynt. Bydd Plaid Cymru yn buddsoddi mewn dyfodol gwell i ganol Castell-nedd ac yn helpu ein tref a'n strydoedd mawr i adfywio wedi blynyddoedd o esgeulustod a dirywiad, ac effaith Covid. ”