Plaid Cymru Castell-Nedd a Dwyrain Abertawe Gweithio'n galed dros Bobl Castell-nedd, a Chymoedd Tawe, Nedd a Dulais.

Mae Plaid Cymru wedi galw am rewi Treth Gyngor CNPT mewn “blwyddyn eithriadol o anodd” i’n cymunedau.

Byddai gwelliant arfaethedig Plaid Cymru wedi rhewi’r dreth gyngor am flwyddyn gan dal i adael y Cyngor â chronfeydd wrth gefn digonol.

Dywedodd y Cynghorydd Alun Llewelyn, Arweinydd grŵp Plaid Cymru ar Gyngor Castell-nedd Port Talbot:

“Mae hon wedi bod yn flwyddyn anodd iawn i’r awdurdod ac mae’r rhain yn amgylchiadau heriol iawn i osod cyllideb. Ond maen nhw'n amseroedd anodd iawn hefyd i'n cymunedau a'n preswylwyr, ar ôl blwyddyn o gyfyngiadau pandemig, cyfnodau clo ac ansicrwydd swyddi. Daw hyn ar ben blynyddoedd o gyni a thoriadau yng ngwasanaethau'r cyngor sydd wedi effeithio ar amgylchedd ac ansawdd bywyd ein holl gymunedau.”

“Er gwaethaf yr ymateb i’r ymgynghoriad cyhoeddus sy’n dangos pryder ysgubol ynghylch lefel  treth y cyngor, gofynnwyd i ni gymeradwyo cyllideb a fyddai’n cynyddu treth y cyngor unwaith eto o 2.75%.

“Mae’r weinyddiaeth Lafur wedi cydnabod y pryder trwy leihau’r cynnydd a argymhellir o 3.75% i 2.75% ond bydd hynny’n dal i adael CNPT gyda’r drydedd dreth y cyngor uchaf yng Nghymru o dipyn.”

“Mae’r ymgynghoriad cyhoeddus yn adlewyrchu’r ymdeimlad amlwg o anhegwch bod ein treth y cyngor gymaint yn uwch na PHOB UN o’n cynghorau cyfagos - Pen-y-bont ar Ogwr, Powys, RhCT, Abertawe, Sir Gaerfyrddin - er bod ein gwasanaethau wedi’u torri flwyddyn ar ôl blwyddyn.”

“Dyna pam mae grŵp Plaid Cymru wedi cynnig rhewi Treth y Cyngor Castell-nedd Port Talbot ar gyfer y flwyddyn eithriadol o anodd hon.”

“Rydyn ni wedi archwilio’r ffigurau. Dywedir wrthym bob amser bod angen cronfeydd wrth gefn ar gyfer diwrnod glawog - wel mae wedi bod yn arllwys hi yn drosiadol drwy'r flwyddyn ar ein trefi, ein pentrefi a'n cymunedau. Nawr yw'r amser y mae ei angen arnom i helpu'r bobl. “

Dywedodd Sioned Williams, Ymgeisydd Senedd Plaid Cymrudros Gastell-nedd:

“Mae trigolion Castell-nedd Port Talbot yn talu un o’r cyfraddau uchaf o dreth y cyngor yng Nghymru gyfan. Mae Plaid Cymru wedi dangos bod gan y Cyngor sy'n cael ei redeg gan Lafur ddewis eleni i dynnu'r pwysau oddi ar bobl sy'n ei chael hi'n anodd o ganlyniad i ddelio â'r argyfwng economaidd ac iechyd mwyaf mewn cof. Byddai hyn wedi gwneud gwahaniaeth enfawr i gannoedd o deuluoedd yn ein hardal sy’n ysgwyddo baich annheg y dreth hon.

“Mae Plaid Cymru wedi addo diwygio Treth y Cyngor os caiff ei hethol i’r llywodraeth yn etholiad Seneddol mis Mai. Rwy’n falch bod Plaid Cymru wedi ymrwymo i wneud treth y cyngor yn decach ac yn fwy blaengar. ”